畫家錦月寫台語散文
寒 幾落日，早起天氣卡燒熱，還殕仔光出門行路，寒天時矣，五點半閣暗眠摸，若無路燈兮庄跤路，人家厝的狗，看到人影著吠，綁咧鐵鍊仔，麻硞硞傱，予人毛管空 麻一直聳，一個人，行佇暗暗兮小路，心肝裡會小可膽膽。歸氣踅斡對這條迵隔壁庄兮大路，規逝直隆隆，有路燈，卡在膽。雙爿闊莽莽的園面，遠遠有幾落搭，網 仔室裡，用一葩電火球仔，炤光咧薅菜；用機車，一載一載，欲載去附近的和成市場，付早市。延路，會搪著三五人，騎鐵馬相綴，後架綁一條低椅仔，戴葵笠，面 掩甲密喌喌，甘但賰兩蕊目睭兮查某人，雖然無相捌，互相頕頭；這群人，是在額的，聽講這裡面，年紀較大的，三個人歲頭仔鬥起來，有兩百外歲，庄內的人佩 服，弓體這組人是「賓士車」，年資有五十年矣。
今仔日，看怹佇園頭拄腳踏車時，以欣羨的心情，詳細共看覓，看怹徛咧，尻川頭伸無啥會直，龍骨看起來一點仔隱痀；落園做功課時，跤頭趺袂堪得跍時，著坐蹛低椅子頂，歸陣人，那薅菜，喙那開講，動作斬然仔扭掠，這款的年歲，會當日出而作，日落而息，對怹來講，是件快樂兮代誌。。
彼陣仔，天氣定定落雨，菜兮價數，雖然袂䆀，毋過菜量失收，農民種作，有時菜金，有時菜土。
踅
入欲倚隔壁庄內，一間土地公廟前，有三四个睏袂當好天光的老大人，坐蹛榕仔跤椅條遐咧開講，榕仔頂厝鳥仔聲嘁嘁喳喳，遠遠傳來咕、咕、咕、、、咕！兮斑鳩
叫聲。一位中年人騎鐵馬，尻川後缀一隻黑狗公，經過廟前，腳踏車拄咧，倚去插一腳，一陣人做伙拍拉涼，庄頭細，拄著大部分攏有熟識，我這个生份人對遐過，
無張持承到一句話鬚，彼个中年人講啥物：『人歲頭若食有 一甲
子，轉去見祖先著有交代矣』。意思是毋是講：過了六十歲，死就無遺憾矣？俗語毋是講：人生七十今仔開始，六十還閣是囡仔疕。我心內想起以前，聽一個長輩講
過，生死，這號代誌，毋是家己會使決定的，毋管是 一甲 子，抑是囡仔疕，雖人歲壽雖雖人領，各人造業各人擔。
那行，行來到這庄大地主一位八十三歲阿伯仔種作兮菜園，伸手摸我兮橐袋仔，提出二十元銀角仔，共買兩把過貓，閣聽伊講一觸久仔伊少年拍拼兮歷史，轉來到厝，已經七點空五分。102年1月4日書
